តុលាការបញ្ឈប់ការផ្ទេរសិទ្ធិច្បាប់ចម្លងជួលឆ្នេរជ័យជម្នះ
យោងតាមច្បាប់ចម្លងនៃឯកសាររបស់តុលាការទទួលបានកាលពីម្សិលមិញថា អ្នកជំនួញជនជាតិរុស្ស៊ី នីកូឡៃ ដូរ៉ូសេនកូ (Nikolai Doroshenko ) និង សេរហ្គេ ប៉ូឡុនស្គី (Sergei Polonsky) ជាប់ពាក់ព័ន្ធក្នុងវិវាទផ្លូវច្បាប់មួយជំុវិញបញ្ហាផ្ទេរសិទ្ធិជួលឆ្នេរជ័យជម្នះ នៅខេត្តព្រះសីហនុ បន្ទាប់ពីមានការដោះលែងលោក ប៉ូឡុនស្គី ពីពន្ធនាគារកាលពីខែមុន។ សាលាដំបូងខេត្តព្រះសីហនុ បានរារាំងលោក ដូរ៉ូសេនកូ ជាបណ្តោះអាសន្នមិនឲ្យផ្ទេរសិទ្ធិជួល៩៩ឆ្នាំដែលក្រុមហ៊ុនរបស់លោក កាន់កាប់ឆ្នេរមានផ្ទៃដី៣.៥៣៦ម៉ែត្រក្រឡាទៅឲ្យក្រុមហ៊ុនតៃវ៉ាន់មួយ ពីព្រោះគាត់បានរំលោភលក្ខខណ្ឌកិច្ចសន្យាពីមុនមួយសម្រាប់ដីធ្លីជាមួយលោក ប៉ូឡុនស្គី អតីតមហាសេដ្ឋីអចលនទ្រព្យជនជាតិរុស្ស៊ី។ នៅក្នុងច្បាប់ចម្លងនៃសេចក្តីសម្រេចរបស់តុលាការ “តុលាការជាបណ្តោះអាសន្នមិនអនុញ្ញាតលោក នីកូឡៃ ដូរ៉ូសេនកូ លក់ ដោះដូរ ជួល បញ្ចាំ ផ្ទេរសិទ្ធិ ផ្តល់ជាអំណោយ ចែកកេរ្តិ៍ ឬផ្តល់អំណោយឆ្នេរជ័យជម្នះឡើយ…រាប់ទាំងអគារ កំពង់ផែ និងនាវាផង លុះត្រាតុលាការសម្រេចលើសំណុំរឿងក្តីនេះរួចរាល់សិន”។ សេចក្តីសម្រេចរបស់តុលាការចុះថ្ងៃទី៣០ ខែមេសានេះ និងចុះហត្ថលេខាដោយលោក គឹម អេង អនុប្រធានសាលាដំបូងខេត្ត ធ្វើឡើងបន្ទាប់ពីលោក ប៉ូឡុនស្គី បានដាក់ពាក្យបណ្តឹងថ្ងៃទី១៨ ខែមេសា ។ … សេចក្តីសម្រេចរបស់តុលាការនេះមានខ្លឹមសារថា នៅថ្ងៃទី៨ ខែមេសាឆ្នាំ២០១៣ លោក ដូរ៉ូសេនកូ បានផ្ទេរកិច្ចសន្យាជួលឆ្នេរជ័យជម្នះនេះ ទៅឲ្យជនជាតិអ៊ុយក្រែនវ័យ៣៨ឆ្នាំម្នាក់ ដែលឈ្មោះរបស់គាត់ត្រូវបានលុបចេញពីឯកសារ ដែលក្រោយមកបានប្រគល់សិទ្ធិរបស់លោកឲ្យទៅលោក ប៉ូឡុនស្គី។ ក្រោយមក ជនជាតិអ៊ុយក្រែនរូបនេះបានកក់ប្រាក់និងបានយល់ព្រមបង់ចំនួនប្រាក់នៅសល់នៃការវិនិយោគ បន្ទាប់ពីទទួលបានលិខិតផ្លូវច្បាប់ពីការផ្ទេរនេះ សេចក្តីសម្រេចរបស់តុលាការនេះ ដែលលើកឡើងថា ប្រាក់កក់នេះត្រូវបានផ្តល់ដោយលោក ប៉ូឡុនស្គី។ អ្នកតំណាងទាំងមកពីភាគីលោក ដីរ៉ូសេនកូ និងលោក ប៉ូឡុនស្គី បានឲ្យដឹងថាប្រាក់កក់នេះមានចំនួន២០០.០០០ដុល្លារ បើទោះជាតួលេខនេះត្រូវបានលុបចេញពីឯកសាររបស់តុលាការក៏ដោយ។ ឯកសារតុលាការមានខ្លឹមសារថា នៅខែបន្ទាប់មកទៀត បុរសជនជាតិអ៊ុយក្រែនរូបនេះ មិនដែលបានទទួលលិខិតផ្ទេរសិទ្ធិនេះទេ។ ប៉ុន្តែ លោក ដូរ៉ូសេនកូ បានលក់កិច្ចសន្យាជួលនេះទៅឲ្យជនជាតិតៃវ៉ាន់ម្នាក់ ដោយរំលោភកិច្ចសន្យា។ ទោះជាយ៉ាងណា មេធាវីរបស់លោក ដូរ៉ូសេនកូ បានអះអាងកាលពីម្សិលមិញថា លោក ប៉ូឡុនស្គី និយាយកុហកតុលាការឲ្យពួកគេសម្រេចជួសមុខគាត់ និងបាននិយាយថា លោក ដូរ៉ូសេនកូ បានធ្វើពាក្យបណ្តឹងតបវិញ។ …
Joshua Wilwohl
http://www.cambodiadailykhmer.com/news/14327/
